தந்த்ர குரு பரம்பரை

தந்த்ராசார்யர் பிரம்மஶ்ரீ தாமோதரரு நாராயணரரு மற்றும் தேவகி அந்தர்ஜனம் ஆகியோரின் புத்திரரும், மந்த்ர வித்யா பீடத்தின் குருவுமான “பிரம்மஶ்ரீ T.D.P. நம்பூதிரி” அவர்கள் நமது குருநாதர் ஸ்ரீ யுகானந்த நாதரின் பிரதான குரு ஆவார். குருகுலக் கல்வி முறையில் பிரசித்தி பெற்ற மந்த்ர வித்யா பீடத்தில், கேரள தேவஸ்வம் வாரியத்தால் அங்கீகரிக்கப்பட்ட தந்த்ரம், பூஜை, யோகா, சமஸ்கிருதம், வாஸ்து மற்றும் ஜோதிடம் குறித்த கல்விகள் பயிற்றுவிக்கப்படுகிறது. பிரம்மஶ்ரீ T.D.P. நம்பூதிரி அவர்கள் நம் குருவிற்கு ஶ்ரீவித்யா உபாசனை க்ரமத்தின் வழிகாட்டுதலோடு, சக்தி கலச அபிஷேகம் நடத்தியும், ஶ்ரீவித்யாராஜ்ஞீ போன்ற ரஹஸ்யமான ஶ்ரீவித்யா தேவதைகளின் மந்த்ர உபதேசமும் அருளி உள்ளார்.

“பிரம்மஶ்ரீ ராமகிருஷ்ண பட்” அவர்கள் ஶ்ரீதர் சுவாமியின் சிஷ்யரான ஶ்ரீ குருதாஸ் சுவாமி அவர்களின் சிஷ்யராவார். அவரே நம் குருநாதருக்கு, தமிழ்நாடு மற்றும் கர்நாடக மாநிலங்களில் உள்ள பல்வேறு ஶ்ரீவித்யா ஆலயங்களில் அனுஷ்டிக்கப்படும் வைதீக சம்ப்ரதாயமாக பிரசித்தி பெற்றுள்ள மிஸ்ர வேத சம்ப்ரதாயத்தையும், ஶ்ரீவித்யா பரம்பரையில் வெகு சிலருக்கு மட்டுமே அறிந்த மூகாம்பிகை தந்த்ரத்தையும் போதித்து அருளினார்.

நமது குருநாதர், காளியார் தாந்த்ரீக வித்யா பீடத்தின் “ஶ்ரீ ரதீஷ் ஆச்சார்யா” அவர்களிடம் இருந்து திராவிட கௌள வாமம், திராவிட மாத்ருகம் மற்றும் திராவிட ஜோதிஷம் பயின்று உள்ளார். பல்வேறு குருமார்களிடம் கல்வி பயின்ற ரதீஷ் ஆச்சார்யா அவர்களின் திராவிட மார்க்க குரு, தக்ஷிணாமூர்த்தி தந்த்ர வித்யாலயத்தின் குரு “ஶ்ரீ ரெஜி தக்ஷிணாமூர்த்தி” ஆவார். பணிக்கர் களரியின் பிரகாஷன் குருக்கள் நமது குருநாதருக்கு களரி மற்றும் யோக பயிற்சியுடன் சித்த யோகா மற்றும் தந்த்ர சாதனா ஆகியவற்றை போதித்துள்ளார்.

நமது குருநாதர், அவதூதர் ஶ்ரீ வேணுகோபால் அவர்களின் வழிகாட்டுதலில் சமய மார்க்கத்தில் தீக்ஷை பெற்றுள்ளார். ஶ்ரீ வேணுகோபால் அவர்கள், ஶ்ரீ பைரவாநந்தரின் சிஷ்யரான ஶ்ரீ பாலகிருஷ்ணநாத் அவர்களின் சிஷ்யராவார். இந்த குரு பரம்பரை, சமய மார்க்கத்தின் ஶ்ரீவித்யா மந்த்ர சாதனையை பின்பற்றுகிறது. மேலும், ஹம்ஸ வித்யையை அடிநாதமாக கொண்டுள்ள பரா சாதனை இம்மார்க்கத்தின் முதன்மை போதனையாகும்.

மேற்கண்ட தீக்ஷை மற்றும் குரு உபதேசங்கள் அனைத்தும் குரு ஶ்ரீ ஜீதேஷ் சத்யன் அவர்கள் நேரடியாக குரு முகமாக பயின்றவை ஆகும். மேலும் அவர் ஆன்லைன் வாயிலாக பல்வேறு கௌள, மிஸ்ர குரு பரம்பரையைச் சேர்ந்த ஆச்சார்யர்களைத் தொடர்பு கொண்டு பயிற்சியும் பெற்றுள்ளார். அதில் மேன்ப்லந்தர் (Manblunder) ஐ சேர்ந்த ஶ்ரீ ரவி ஜி, மேதா யோகாவை (Medha Yoga) சேர்ந்த ஶ்ரீ கிருஷ்ணா ஜி போன்ற குருமகான்கள் மூலம் ஶ்ரீ சக்ர பூஜை, மற்றும் பல்வேறு பூஜா ஜப விதானங்களை பயின்றுள்ளார். மந்த்ர ஜபங்களுக்கு பெரும் முக்கியத்துவம் அளிக்கும் ஶ்ரீ ரவி ஜி நம் குரு அவர்களுக்கு ஶ்ரீசக்ர பூஜை முறைகளை கற்பித்து, மற்றும் கேரளத்தில் உள்ள பல்வேறு தந்த்ர முறைகளை நேரடியாக பயில வழிகாட்டி உள்ளார்.